కరోనా జాగ్రత్తలు ప్రతీ ఒక్కరు తీసుకోవాలి

22-01-202222-01-2022 21:05:36 IST
2022-01-22T15:35:36.983Z22-01-2022 2022-01-22T15:35:33.585Z - - 27-05-2022

ప్రస్తుతం దేశవ్యాప్తంగా కరోనా కేసులు విపరీతంగా పెరిగిపోతున్నాయి. కరోనా దరి చేరకుండా ప్రజలు అప్రమత్తంగా ఉండాలని పలు సూచనలు చేస్తున్నారు. అవి.. కోవిడ్‌ పాజిటివ్‌గా తేలినవారు తక్షణమే హోం ఐసోలేషన్‌లోకి వెళ్లిపోవడం మంచిది. ఇంట్లో వసతిని బట్టి ప్రత్యేక గదిలో ఐసోలేషన్‌లో ఉండాలి. వసతి లేనివారు ప్రభుత్వం ఏర్పాటు చేసిన ఐసోలేషన్‌ కేంద్రాల్లో చేరొచ్చు.  ఇరుకు గదులు, రెండే గదులున్న ఇళ్లలో ఐసోలేషన్‌ పాటించడం కాస్త కష్టమే. తప్పనిసరి అయితే ఒక మూలన 6/6 అడుగుల విస్తీర్ణం కవరయ్యేలా జాగ్రత్తలు తీసుకోవాలి. హోం ఐసోలేషన్‌లో ఉన్నవారు, ఇంట్లోని వారందరూ తప్పకుండా మాస్కు ధరించాలి. ఆరు అడుగుల భౌతికదూరాన్ని పాటించాలి. క్లాత్‌ మాస్కు అయితే రెండు లేయర్లు ఉండేవి వాడాలి. వాటిని ప్రతి 4 గంటలకోసారి శుభ్రం చేసుకోవాలి. ఎన్‌–95 మాస్క్‌ అయితే రోజంతా వాడొచ్చు. ఇంట్లోకి మంచి వెలుతురు, గాలి వచ్చేలా ఏర్పాట్లు చేసుకోవాలి. 

లక్షణాలు లేని వారైతే విటమిన్‌ ట్యాబ్లెట్లు తీసుకుంటే సరిపోతుంది. లక్షణాలున్నవారు మాత్రం తప్పకుండా వైద్యుడిని ఫోన్‌లోగానీ, వీడియోకాల్‌ ద్వారా గానీ సంప్రదించి చికిత్స తీసుకోవాలి. 

ప్రస్తుతం వ్యాప్తి చెందుతున్న వైరస్‌తో ఒళ్లు నొప్పులు, తలనొప్పి, జ్వరం, దగ్గు, ముక్కు కారడం, గొంతులో గరగర లాంటి లక్షణాలు ఎక్కువగా ఉంటున్నాయి. బాధితులు తరచూ గోరువెచ్చని నీటితో పుక్కిలించడం చేయాలి. వీలైతే గోరువెచ్చని నీటినే తాగడం మంచిది. తాజా ఆహారాన్ని వేడిగా ఉన్నప్పుడే తినాలి. ఆర్థిక స్తోమతను బట్టి డ్రైఫ్రూట్స్, ఇతర పళ్లు, రోజుకొక ఉడికించిన కోడిగుడ్డు తీసుకోవచ్చు. మంచి ఆహారం, విశ్రాంతితో రోగనిరోధక శక్తి బలపడుతుంది. కోవిడ్‌ను సులభంగా జయించవచ్చు. పరిశుభ్రత పాటించాలి. ఉతికిన బట్టలు వేసుకోవాలి. ఏడు రోజులు హోం ఐసోలేషన్‌లో ఉండాలి. తర్వాత ఎలాంటి లక్షణాలు లేకుంటే మళ్లీ కోవిడ్‌ పరీక్ష చేయించాల్సిన అవసరం లేదు. ఒకవేళ లక్షణాలుంటే.. పరీక్ష చేయించి నిర్ధారించుకోవాలి. మళ్లీ పాజిటివ్‌ వస్తే మరికొంత కాలం ఐసోలేషన్‌లో ఉండాలని వైద్యులు సూచిస్తున్నారు.