ఒకటి కాదు రెండు కాదు అనేక ప్రమాదాలు. రోడ్లపై నెత్తుటి మరకలు ఏర్పడ్డాయి. తమిళనాడులో జరిగిన రెండు వేర్వేరు రోడ్డు ప్రమాదాల్లో 24 మంది దుర్మరణం పాలయ్యారు. తిర్పూరు జిల్లా అవినాశి వద్ద..ఆర్టీసీ బస్సును ఎదురుగా వస్తున్న కంటైనర్‌ లారి ఢీకొన్న ఘటనలో 20 మంది మరణించారు. 31 మంది గాయపడ్డారు. కేరళ ప్రభుత్వం నడుపుతున్న బస్సు తిర్పూరు నుంచి తిరువనంతపురం వెళుతోంది. ప్రమాద సమయంలో బస్సులో 48 మంది ప్రయాణికులు ఉన్నారు.

అతి వేగంతో ప్రయాణిస్తోన్న సమయంలో కంటైనర్ టైర్ పేలి అదుపుతప్పి బస్సును ఢీకొట్టినట్టు పోలీసులు తెలిపారు. కంటైనర్ డ్రైవర్ పరారీలో ఉన్నాడు. మృతుల వివరాలు సేకరిస్తున్నారు.ఈ బస్సులో అధికమంది కేరళలోని పాలక్కడ్‌, త్రిస్పూర్‌, ఎర్నాకుళం పట్టణాలకు చెందిన వారే ఉన్నారు.

ఈ ప్రమాదం జరిగిన రెండు గంటల వరకు బస్సులో నుంచి ఒక్క ప్రమాణికుడు కూడా బయటకు రాలేకపోయారు. దీంతో మృతుల సంఖ్య పెరిగింది. క్రేన్లు, గ్యాస్ కట్టర్స్ సాయంతో సహాయక చర్యలు కొనసాగుతున్నాయి. పోలీసులు, అధికారులు సంఘటనా స్థలానికి చేరుకుని సహాయ కార్యక్రమాలను పర్యవేక్షిస్తున్నారు. ఇటు సేలం జిల్లా ఓమలూరులో మరో ప్రమాద జరిగింది. కారు- ప్రైవేట్ బస్సు ఢీకొనడంతో ఐదుగురు నేపాల్ వాసులు మరణించారు. గాయపడ్డవారిని ఆస్పత్రికి తరలించి చికిత్స అందిస్తున్నారు. 

ఇటు హైదరాబాద్ మియపూర్ పోలీసు స్టేషన్ పరిధిలోని హాఫిజ్ పేట్ వద్ద ఓ కారు బీభత్సం సృష్టించింది. డ్రైవర్ మద్యం మత్తులో ఉండటంతో కారు అదుపుతప్పి గ్రీన్ బావర్చి హొటల్ ముందు సిగరెట్ తాగుతున్న అఫ్సర్ అనే వ్యక్తి పైకి కారు దూసుకెళ్లింది. ఈ ప్రమాదంలో అఫ్సర్ అక్కడికక్కడే మృతి చెందాడు. మరో రెండు ద్విచక్ర వాహనాలు ధ్వంసమయ్యాయి. పలువురు స్వల్పంగా గాయపడ్డారు. 

కర్నూలు జిల్లాలో ఘోరమయిన అత్యాచారానికి గురైన సుగాలి ప్రీతి కేసులో కదలిక వచ్చింది. ఏపీ సీఎం వైయస్‌ జగన్‌ ను సుగాలి ప్రీతి కుటుంబ సభ్యులు కలుసుకున్నారు. తమకు న్యాయం చేయాలని సీఎంను కోరారు. కర్నూలులో కంటి వెలుగు మూడోదశ కార్యక్రమాన్ని ప్రారంభించిన సందర్భంగా ఏర్పాటు చేసిన బహిరంగసభలో ప్రసంగించిన తర్వాత సుగాలి ప్రీతి తల్లి పార్వతి బాయితో పాటు వారి కుటుంబ సభ్యులు సీఎంను కలుసుకున్నారు. 

ఈ కేసును సీబీఐకి రిఫర్‌ చేస్తున్నామని, తప్పక న్యాయం జరుగుతుందని సీఎం జగన్ భరోసా ఇచ్చారు. బాధితురాలి కుటుంబాన్ని ఆదుకుంటామని, వారికి అండగా నిలుస్తామని సీఎం స్పష్టంచేశారు. ఈ విషయమై మరో సారి కూలంకషంగా మాట్లాడతానని, తన వద్దకు రావాలని ప్రీతీ కుటుంబానికి జగన్ సూచించారు. అధికారులను తగిన ఏర్పాట్లు చేయాలని ఆదేశించారు. 

ఇటు జగన్ నిర్ణయంపై జనసేన స్పందించింది. ఇది మంచి పరిణామం అన్నారు జనసేనాని పవన్. జగన్ ప్రభుత్వం తీసుకున్న నిర్ణయంతో సుగాలి ప్రీతి కుటుంబానికి ఒకింత ఊరట కలిగిస్తుంది. బాధితురాలి కుటుంబానికి న్యాయచేయడంలో ఆలస్యం జరిగిందన్నారు పవన్.

సీబీఐ విచారణ ద్వారా ఆ ప్రక్రియను వేగవంతం చేయాలి. పాఠశాలకు వెళ్ళిన చిన్నారిపై అఘాయిత్యం చేసిన వాళ్ళని కఠినంగా శిక్షించాలని కర్నూలు నడిబొడ్డున లక్షలమంది ప్రజలం నినదించారు. ప్రభుత్వం కదలిక వచ్చేలా సుగాలి కుటుంబానికి వెన్నంటి నిలిచిన వారందరికీ పవన్ ధన్యవాదాలు తెలిపారు. జనసేన పార్టీ తరఫున సుగాలి ప్రీతికి న్యాయం చేయాలని పవన్ పోరాటం చేస్తూనే వున్నారు. జగన్ దీనిపై స్పందించడంతో పవన్ సంతృప్తి వ్యక్తం చేశారు. 

రోడ్డు ప్రమాదాలు ఆందోళన కలిగిస్తున్నాయి. పశ్చిమగోదావరి జిల్లాలో గుబ్బల మంగమ్మ గుడికి భక్తులతో వెళ్తున్న వ్యాన్ బోల్తా పడింది. ఈ ప్రమాదంలో తొమ్మిదిమందికి తీవ్ర గాయాలయ్యాయి. గాయపడ్డవారిలో ఒకరి పరిస్థితి విషమంగా ఉందని తెలుస్తోంది. గాయపడ్డవారిని మెరుగైన వైద్యం కోసం సమీపంలోని ఆస్పత్రికి తరలించారు. జంగారెడ్డిగూడెం మండలం శ్రీనివాసపురం- అక్కంపేట మలుపు వద్ద  వ్యాన్ అదుపు తప్పి బోల్తా పడింది. 

ప్రమాద సమయంలో వ్యాన్ లో 22 మంది భక్తులు ఉన్నారు. ప్రమాద వార్త తెలిసిన వెంటనే క్షతగాత్రులను 108 వాహనంలో జంగారెడ్డిగూడెం ఏరియా హాస్పిటల్ కు తరలించారు. భీమవరం సమీపం లోని పాలకోడేరు మండలం విస్సాకోడేరు గ్రామం నుండి గుబ్బల మంగమ్మ గుడికి వెళ్తున్నారు భక్తులు.

విశాఖలో రోడ్డు ప్రమాదం.. 

ఇటు విశాఖలోని మధురవాడ జాతీయ రహదారిపై ఘోర రోడ్డు ప్రమాదం జరిగింది. అయితే ప్రాణాపాయం తప్పింది. విశాఖపట్నం నుండి తగరపువలస వైపు కూల్ డ్రింక్స్ లోడుతో ఉన్న మినీ ట్రాన్స్ పోర్ట్ టైరు పేలడంతో అదుపుతప్పి బోల్తా కొట్టింది. ఈ ప్రమాదం కారణంగా విశాఖలోని 16 వ నంబర్ జాతీయ రహదారిపై రెండు కిలోమీటర్ల మేర నిలిచిపోయింది ట్రాఫిక్. సంఘటన స్థలానికి చేరుకున్న పీఎం పాలెం ట్రాఫిక్ పోలీసులు పరిస్థితిని చక్కదిద్దారు. ప్రత్యామ్నాయమార్గాల ద్వారా ట్రాఫిక్ మళ్ళించారు. 

స్మగ్లర్లు తెగ రెచ్చిపోతున్నారు. వేటినీ వదలడం లేదు. ఈమధ్యే వేరుశెనగ కాయల్లో విదేశీ కరెన్సీని రవాణా చేస్తూ ఎయిర్ పోర్టులో అడ్డంగా దొరికిపోయిన సంగతి తెలిసిందే. తాజాగా ఢిల్లీ అంతర్జాతీయ విమానాశ్రయంలో ఓ స్మగ్లర్ ఐడియాకు కస్టమ్స్ అధికారులకు మైండ్ బ్లాంక్ అయింది. 

సెంట్ బాటిల్స్ లోపల విదేశీ కరెన్సీ ఉండడం చూసి అధికారులు అవాక్యయ్యారు. ఢిల్లీ ఎయిర్ పోర్టులో టెర్మినల్ 3 చెకిన్ కౌంటర్ సమీపంలో ఓ వ్యక్తి కదలికలు అనుమానంగా వున్నాయి. దీంతో అధికారులు అతడిని పరిశీలించారు. వెంటనే అదుపులోకి తీసుకుని అతని లగేజీని చెక్ చేశారు. అతడి బ్యాగులు ఎక్స్ రే స్కానర్లో తనిఖీ చేశారు. గుడ్డ సంచుల్లో సెంట్ బాటిల్స్ కనిపించాయి. వాటిని పరిశీలనగా చూస్తే అసలు విషయం బయటపడింది.

బాటిల్స్ లోపల కువైట్ దీనార్లు, సౌదీ రియాళ్ళు కనిపించాయి. చుట్టలుగా చుట్టి అనుమానం రాకుండా తరలించేందుకు ప్రయత్నించాడు 40 ఏళ్ళ మహ్మద్ ఆర్షి. ఈ విదేశీ కరెన్సీ విలువ రూ. 42.35 కోట్లుగా లెక్క కట్టారు. అయితే అతని దగ్గర సరైన పత్రాలు లేకపోవడంతో కస్టమ్స్ అధికారులు అదుపులోకి తీసుకున్నారు. ఎయిరిండియా విమానంలో దుబాయి వెళ్ళేందుకు ఆర్షి ప్రయత్నించాడు. అతని ద్వారా ఈ పని చేయించింది ఎవరనేదానిపై కూపీలాగుతున్నారు. 

బంగారం, విలువైన వజ్రాలను అక్రమంగా తరలించేందుకు స్మగ్లర్లు ప్రయత్నాలు చేస్తూనే వున్నారు. వారం క్రితం మురద్ ఆలం అనే వ్యక్తి.. వేరుశెనగకాయల్లో గింజలు తీసేసి... వాటి స్థానంలో విదేశీ కరెన్నీ నోట్లను దారంతో చుట్టి వాటిని సెలో టేప్‌ వేసి తీసుకు వచ్చాడు. మరోవైపు బిస్కెట్‌ ప్యాకెట్లలోనూ నోట్లను అమర్చాడు.

అయితే అతగాడు బ్యాగ్‌లో బిస్కెట్‌ ప్యాకెట్లు, వేరుశెనగకాయలను అంత భద్రంగా ఎందుకు తెచ్చాడో అనుమానించిన అధికారులు తనిఖీలు చేశారు. దీంతో గుట్టురట్టయింది. దుబాయి నుంచి విదేశీ కరెన్సీని తీసుకువచ్చాడు. సరైన పత్రాలు లేకపోవడంతో వాటిని సీజ్ చేశారు. మరోసారి సెంట్ బాటిల్స్ లో విదేశీ కరెన్సీ పట్టుబడడం సంచలనం రేపుతోంది. 

టెక్నాలజీ కొత్త పుంతలు తొక్కుతున్న వేళ యాప్ ల ద్వారా మనీ ట్రాన్స్ఫర్ లు ఎక్కువయ్యాయి. గతంలోలా బ్యాంకులకు, ఏటీఎంలకు వెళ్ళేవారి సంఖ్య క్రమేపీ తగ్గుతోంది. నోట్ల రద్దు తర్వాత దేశవ్యాప్తంగా నగదు ఫ్లో తగ్గింది. బ్యాంకుల్లో నగదు కనిపించడంలేదు. అంతా ఎలక్ట్రానిక్ తరలింపులే. దీంతో ఏటీఎంల వినియోగం తగ్గిపోతోంది. ఏటీఎంల నిర్వహణ కష్టంగా మారింది. నగదు రహిత లావాదేవీలను ప్రోత్సహిస్తున్నామని చెబుతూనే.. తాజాగా ఏటీఎంలకు సంబంధించిన ఫీజులను పెంచే యోచనలో బ్యాంకులు వున్నట్టు తెలుస్తోంది.

వివిధ బ్యాంకులు తమ ఖాతాదారులు ఇతర బ్యాంకుల నుంచి కూడా నగదు విత్ డ్రా చేసుకుంటూ వుంటాయి. ఈ నేపథ్యంలో ఇంటర్ ఛేంజ్ ఫీజులు పెంచాలని భారత ఏటీఎం ఆపరేటర్ల సంఘం ఇటీవల ఆర్బీఐకు లేఖ రాసింది. కస్టమర్లకు ఇప్పుడు ఇస్తున్న ఉచిత లావాదేవీలకు కూడా కోత విధించనున్నారు. ప్రస్తుతం 5 ఉచిత లావాదేవీలను 3కు తగ్గించాలని.. అలాగే ఉచిత లావాదేవీల అనంతరం నగదు ట్రాన్సాక్షన్స్‌పై 17 రూపాయలు, నగదు రహిత ట్రాన్సాక్షన్స్‌పై 7 రూపాయల చొప్పున వసూలు చేయాలని ప్రతిపాదనలు పంపాయి. 

అలాగే గ్రామీణ ప్రాంతాల్లో 18 రూపాయలు,నగదు రహిత ట్రాన్సాక్షన్స్‌పై 8 రూపాయల చొప్పున వసూలు చేయడానికి అనుమతి కోరుతున్నాయి. ఈ ప్రతిపాదనలకు రిజర్వుబ్యాంక్ ఆఫ్ ఇండియా అనుమతి మంజూరు చేస్తే వినియోగదారులకు మాత్రం అదనపు భారం పడనుంది. త్వరలోనే దీనిపై నిర్ణయం వెలువడే అవకాశం ఉంది.

క‌ట్టుకున్న వాడితో జీవితాన్ని పంచుకోవాల‌ని అత్తారింటిలో అడుగుపెట్టిన ఆమెకు ఊహించ‌ని చేదు అనుభ‌వాలు ఎదుర‌య్యాయి. దాంతో భ‌ర్త‌తో జ‌రిగిన‌ చిరు త‌గాదాలు కాస్తా తారా స్థాయికి చేరాయి. పెళ్లైన ఆర్నెళ్ల‌కే సంసార జీవితంలో క‌లహాలు మొద‌ల‌వ‌డంతో కుంగిపోయిన ఆ న‌వ వ‌ధువు మ‌ర‌ణ‌మే శ‌ర‌ణ్య‌మ‌ని భావించింది.

ముందుగా అనుకున్న‌ట్టుగానే విజ‌య‌వాడ క‌న‌క‌దుర్గ‌మ్మ అమ్మవారి ద‌ర్శ‌నం నిమిత్తం భ‌ర్త‌తో క‌లిసి వ‌చ్చిన న‌వ వ‌ధువు కృష్ణా న‌దిలో దూకి చ‌నిపోవాల‌నుకుంది. అనుకున్న‌దే త‌డ‌వుగా కృష్ణా న‌దిలో దూకి ఆత్మ‌హ‌త్య‌కు య‌త్నించింది. అయితే, ప‌క్క‌నే ఉన్న ఎస్‌డీఆర్ఎఫ్ సిబ్బంది గ‌మ‌నించి ఆమెను ఒడ్డుకు చేర్చారు. ఆమెను ర‌క్షించేందుకు న‌దిలో దూకిన భ‌ర్త‌ను కూడా ఎస్‌డీఆర్ఎఫ్ సిబ్బంది కాపాడారు.

స‌మాచారం తెలుసుకున్న పోలీసులు ఘ‌ట‌నా స్థ‌లానికి చేరుకుని న‌వ వ‌ధూ వ‌రుల‌ను చికిత్స నిమిత్తం ఆస్ప‌త్రికి త‌ర‌లించారు. వారిని ప‌రిశీలించిన వైద్యులు ఎటువంటి ప్రాణాపాయం లేద‌ని చెప్ప‌డంతో అంద‌రూ ఊపిరి పీల్చుకున్నారు. అనంత‌రం ఆత్మ‌హ‌త్యా య‌త్నానికి గ‌ల కార‌ణాల‌పై పోలీసులు ఆరా తీశారు. పోలీసుల విచార‌ణ‌లో న‌వ వ‌ధువు చెప్పుకొచ్చిన అస‌లు వివ‌రాలు ఇలా ఉన్నాయి.

భ‌ర్త పేరు శ్రీ‌కాంత్ అని, త‌న పేరు హేమ‌ల‌త‌గా న‌వ వ‌ధువు చెప్పుకొచ్చింది. గుంటూరు జిల్లాకు చెందిన త‌మ‌కు ఆర్నెళ్ల క్రిత‌మే పెళ్లైంద‌ని తెలిపింది. పెళ్లైన నాటి నుండే కుటుంబ క‌ల‌హాలు మొద‌ల‌య్యాయ‌ని చెప్పింది. భ‌ర్త‌తో గొడ‌వలు జ‌ర‌గ‌డంతో తామిద్ద‌రి మ‌ధ్య కొంత దూరం పెరిగింద‌ని వివ‌రించింది. ఇక అప్పుడే ఆత్మ‌హ‌త్య చేసుకోవాల‌ని తాను నిర్ణ‌యించుకున్నానంటూ న‌వ వ‌ధువు వెల్ల‌డించింది.

దాంతో ముందుగా అనుకున్న ప్ర‌కారం విజ‌య‌వాడ దుర్గగుడికి వ‌చ్చేందుకు భ‌ర్త శ్రీ‌కాంత్‌ను ఒప్పించాన‌ని, గొడ‌వ‌లు స‌ర్దుమ‌ణుగుతాయ‌నుకుంటే ఆల‌యంలోనూ మొద‌ల‌య్యాయ‌ని తెలిపింది. ఇద్ద‌రి మ‌ధ్య కొంత వివాదం చోటు చేసుకుంది. భ‌ర్త శ్రీ‌కాంత్ త‌న‌పై కోప్ప‌డంతో కృష్ణా న‌దిలో ఆత్మ‌హ‌త్య చేసుకునేందుకు య‌త్నించాన‌ని హేమ‌ల‌త తెలిపింది.

హేమ‌ల‌త ఇచ్చిన స‌మాచారం మేర‌కు పోలీసులు ఇరు కుటుంబ స‌భ్యుల‌ను పిలిపించారు. హేమ‌ల‌త‌, శ్రీ‌కాంత్‌ల‌కు పోలీసులు కౌన్సెలింగ్ ఇచ్చారు. వారిద్ద‌రితోపాటు ఇరు కుటుంబ స‌భ్యుల‌కు కూడా పోలీసులు అస‌లు విష‌యాలు తెలిపి కౌన్సెలింగ్ ఇచ్చారు. వారిద్ద‌రి మ‌ధ్య గొడ‌వ ఎలా జ‌రిగింది..? స‌మ‌స్యను ఎలా ప‌రిష్క‌రించాలి..? అన్న ప్ర‌శ్న‌ల‌పై ఆరా తీయ‌డంతోపాటు చ‌నిపోవ‌డ‌మే ప‌రిష్కారం కాదంటూ వారికి పోలీసులు అవ‌గాహ‌న క‌ల్పించారు

రోడ్డు ప్రమాదాలు బాధితుల కుటుంబాల్లో విషాదం నింపుతున్నాయి. యూపీలోని ఉన్నావ్ లో ట్రక్కు, వ్యాను ఢీకొనడంతో భారీగా మంటలు వ్యాపించాయి. ఈ ప్రమాదంలో ఏడుగురు సజీవ దహనమయ్యారు.  బాంగర్మవూ పోలీస్ స్టేషన్ పరిధిలోని ఆగ్రా-లక్నో ఎక్స్‌ప్రెస్ వే టోల్ ప్లాజా వద్ద చోటుచేసుకుందని పోలీసులు తెలిపారు. ఈ రహదారిపై ఎదురెదురుగా వచ్చిన ట్రక్కు, మారుతి వ్యాను ఢీకొన్నాయి. 

ఈ ప్రమాదంతో వ్యాన్ అంతటా మంటలు వ్యాపించాయి. దీంతో వ్యానులో ఉన్నవారు బయటకు రాలేక లోపలే చిక్కుకుని పోయారు. దీంతో వారంతా  సజీవ దహనమయ్యారు. సంఘటనా స్థాలానికి చేరుకున్న పోలీసులు మృతదేహాలను బయటకు తీసి మార్చురీకి తరలించారు. ప్రమాద స్థలంలోె బీభత్సకరమయిన వాతావరణం నెలకొంది. ప్రమాదవార్త తెలుసుకున్న స్థానికులు పోలీసులకు సమాచారం అందించారు. సహాయకచర్యల్లో వారు పాల్గొన్నారు. 

అన్నవరంలో బండరాయిని ఢీకొన్న కారు 

తూర్పుగోదావరి జిల్లా అన్నవరం వద్ద 16వ నంబర్‌ జాతీయ రహదారిపై ఆదివారం తెల్లవారు జామున జరిగిన ఘోర రోడ్డు ప్రమాదంలో ఇద్దరు దుర్మరణం పాలయ్యారు. వేగంగా వెళ్తున్న కారు అదుపు తప్పి రోడ్డు పక్కన ఉన్న పెద్ద బండరాయిని ఢీకొని పల్టీలు కొట్టింది. దీంతో కారులో ప్రయాణిస్తున్న కట్టా శ్రీనివాసులు, ముందు సీట్లో కూర్చున్న దొమ్మేటి పవన్‌కుమార్‌ అక్కడికక్కడే చనిపోయారు. స్నేహితుడి పెళ్ళికి వెళ్లి వస్తుండగా ఈ ప్రమాదం జరిగింది. గుత్తుల బాలు, దొమ్మేటి వెంకటేష్‌ గాయపడ్డారు. 

మూడుముళ్ళు.. ఏడడుగులు.. వందేళ్ళు కలిసి జీవించమని బంధువులు, స్నేహితులు ఆశీర్వదించారు. కానీ ఆ పెళ్ళికొడుకు పెళ్ళి జరిగిన వెంటనే కన్నుమూశాడు. ఇదేదో సినిమా సీన్ కానేకాదు. తెలంగాణలోని నిజామాబాద్ జిల్లా బోధనలో పెళ్లింట జరిగిన ఈ ఘటన విషాదాన్ని నింపుతోంది. 25 ఏళ్ల గణేష్ కి పెళ్ళయింది. శుక్రవారం మధ్యాహ్నం పెళ్ళి అయిన తర్వాత రాత్రి బారాత్ నిర్వహించారు. పెళ్లి బారాత్ అంటే మామూలుగా ఉండదుగా. డీజే సౌండ్ లు, బంధువుల హడావిడి. అదే ఆ పెళ్లి కొడుకు పాలిట శాపంగా మారింది. 

డీజే సౌండ్ కారణంగా గణేష్ తీవ్ర అనారోగ్యం పాలయ్యాడు. వెంటనే బంధువులు అతడిని నిజామాబాద్ లోని ప్రైవేటు ఆస్పత్రికి తరలించారు. వైద్యులు వైద్యం చేసేలోపే అర్థరాత్రి అతడు మరణించాడు. డీజే సౌండ్ కారణంగా అతను గుండెపోటుకి గురయినట్టు చెబుతున్నారు.

తమతో హుషారుగా డ్యాన్స్ చేసిన పెళ్లికొడుకు ఇలా కాసేపటికే తిరిగిరాని లోకాలకు చేరడంతో పెళ్ళికూతురు సహా కుటుంబసభ్యులు విషాదంలో మునిగిపోయారు. నూరేళ్ళు తోడుంటానని మూడు ముళ్ళు వేసిన భర్త దూరం కావడంతో ఆ నవవధువు కన్నీరుమున్నీరవుతోంది. గతంలోనూ బారాత్ లో భాగంగా గుర్రంపై ఊరేగుతూ ఓ పెళ్ళికొడుకు మరణించిన సంగతి తెలిసిందే. 

సంస్కృతి, సాంప్ర‌దాయాల‌కు క‌ళ్లెం వేస్తూ స‌మాజంలో కొంద‌రు వ్య‌వ‌హ‌రిస్తున్న తీరు అత్యంత శోచ‌నీయం. వావి వ‌ర‌స‌లు మ‌రిచి దారుణాల‌కు పాల్ప‌డే వారు కొంద‌రైతే క‌ట్టుకున్న వారి క‌ళ్లుగ‌ప్పి అక్ర‌మ సంబంధాలు నెరిపే వారు మ‌రికొంద‌రు. ఇటువంటి ఘ‌ట‌న‌లు ఏకంగా రోజుకొక‌టి వెలుగు చూస్తుండ‌టం హేయ‌మ‌నే చెప్పాలి.

మొన్న‌టికి మొన్న ఆర్మీ నుండి వ‌చ్చిన భ‌ర్త‌కు షాకిస్తూ కానిస్టేబుల్‌గా విధులు నిర్వర్తిస్తున్న భార్య త‌న ప్రియుడితో క‌లిసి బెడ్ రూమ్‌లో రెడ్ హ్యాండెడ్‌గా దొరికింది. అంత‌కు ముందు ఓ ఎస్సై త‌న భార్య‌కు విడాకులు ఇచ్చైనా స‌రే పెళ్లి చేసుకుంటానంటూ సోష‌ల్ మీడియాలో ప‌రిచ‌య‌మైన యువ‌తిని మాయ‌మాట‌ల‌తో లొంగదీసుకున్న సంగ‌తి విధిత‌మే. నేటి స‌మాజంలో ఈ త‌ర‌హా ఘ‌ట‌న‌లు కోకొల్ల‌లు.

తాజాగా, ఆ కోవ‌కు చెందిన ఘ‌ట‌నే మ‌రొక‌టి వెలుగు చూసింది. కాగా, కుటుంబాన్నే వ‌దిలేసి మ‌రో యువ‌తితో అక్ర‌మ సంబంధం పెట్టుకున్న భ‌ర్త‌ను రెడ్ హ్యాండెడ్‌గా ప‌ట్టించింది ఓ భార్య‌. సంఘ‌ట‌న‌కు సంబంధించి పోలీసులు తెలిపిన మ‌రిన్ని వివ‌రాలు ఇలా ఉన్నాయి.

వికారాబాద్ జిల్లా ప‌రిగిలోని టీచ‌ర్స్ కాల‌నీలో ఖ‌మ్మంకు చెందిన భ‌వాని అనే మ‌హిళ త‌న భ‌ర్త స‌తీష్ వేరొక యువ‌తితో అక్ర‌మ సంబంధం కొన‌సాగిస్తున్నాడ‌ని, త‌నకు న్యాయం జ‌రిగే వ‌ర‌కు ఆందోళ‌న విర‌మించ‌బోన‌ని భ‌ర్త ఇంటి ముందు బైఠాయించ‌డం జ‌రిగింది. కాగా, గ‌త కొద్ది రోజులుగా భవాని పోలీసుల‌కు ఫిర్యాదు చేసినా త‌న‌కు న్యాయం జ‌ర‌గ‌డం లేద‌ని, దాంతో హండ్రెడ్‌కు ఫిర్యాదు చేసి మ‌రీ అక్ర‌మ సంబంధం నెరుపుతున్న త‌న భ‌ర్త‌ను రెడ్ హ్యాండెడ్‌గా పోలీసుల‌కు ప‌ట్టించ‌డం జ‌రిగింది.

అయితే, భ‌వానికి ర‌క్ష‌ణ క‌ల్పించాల్సిన పోలీసులే ఆమెప‌ట్ల దురుసుగా ప్ర‌వ‌ర్తించారు. భ‌ర్త‌తో అక్ర‌మ సంబందం పెట్టుకున్న మహిళ‌తో భ‌వాని కొట్టాట‌కు దిగగా, లేడీ కానిస్టేబుల్స్ ఎవ‌రూ లేక‌పోవ‌డంతో పోలీసులు దురుసుగా ప్ర‌వ‌ర్తించ‌డం జ‌రిగింది. రెడ్‌హ్యాండెడ్‌గా ప‌ట్టుబ‌డ్డ మ‌హిళను అరెస్టు చేసిన పోలీసులు స్టేష‌న్‌కు త‌ర‌లించారు. కాగా, కేసు ఖ‌మ్మం జిల్లా ప‌రిధిలోకి రావ‌డంతో వారికి కౌన్సిలింగ్ ఇచ్చి ఖ‌మ్మం జిల్లాకు పంపించ‌డం జ‌రిగింది.

భ‌వాని మీడియాతో మాట్లాడుతూ, భ‌ర్త స‌తీష్ త‌న‌కు కావాల‌ని, త‌న‌కు ఇద్ద‌రు పిల్ల‌లు ఉన్నార‌ని చెప్పుకొచ్చింది. అక్ర‌మ సంబంధం కార‌ణంగా తమ కుటుంబం గ‌త రెండేళ్లుగా ఇబ్బందులు ప‌డుతున్నామ‌ని, పోలీసులు చ‌ర్య‌లు తీసుకుని న్యాయం చేయాల్సిందిగా కోరింది. విడాకులు ఇవ్వాల‌ని భ‌ర్త వేధిస్తున్న‌ట్లు చెప్పింది. ఇవ్వ‌క‌పోతే చంపేస్తానంటూ పోలీసుల‌కు వివ‌రించింది. అలాగే ఫిర్యాదు చేసినా త‌న‌కు సెక్యూరిటీ ఇవ్వ‌ట్లేద‌ని లేడీ కానిస్టేబుల్స్ కూడా లేకుండా తోసేస్తున్నార‌టూ పోలీసుల తీరుపై ఆగ్ర‌హం వ్యక్తం చేసింది. ప్ర‌స్తుతం ఈ కేసును ఖ‌మ్మం పోలీసులు విచారిస్తున్నారు.

ప్రపంచంలో ఏ మూలనో ఏదైనా జరిగితే మనకేం సంబంధం అంటూ పట్టించుకోకుండా ఉండే కాలం అంతరించింది. కంటికి కనిపించని వైరస్ చైనాలో మొదలై ప్రపంచాన్ని గడగడలాడిస్తుంటే రెండు తెలుగు రాష్ట్రాలు మరోరకంగా విలవిల్లాడుతున్నాయి. కోవిడ్‌–19 వైరస్‌ రెండు తెలుగు రాష్ట్రాల్లో పౌల్ట్రీ రంగాన్ని దారుణంగా దెబ్బతీస్తోంది. గత పక్షం రోజులుగా ఈ ప్రభావంతో పౌల్ట్రీ పరిశ్రమ భారీ నష్టాన్ని చవిచూసింది. కోవిడ్‌–19 వైరస్‌కు, చికెన్, గుడ్లతో ఎలాంటి సంబంధం లేదని వైద్య నిపుణులు స్పష్టం చేస్తున్నా ప్రజల్లో భయాందోళనలు ఏ స్థాయిలో ఉన్నాయంటే కోడి మాంసానికే కాదు.. కోడి గుడ్లకు కూడా రాంరాం చెప్పేస్తున్నారు. ఇప్పటికే చిక్కుల్లో ఉన్న పౌల్ట్రీ పరిశ్రమ కోవిడ్-19 దెబ్బకు తట్టుకోలేకపోతోంది.

కోవిడ్‌–19 వైరస్‌ చికెన్, గుడ్ల ద్వారా వ్యాప్తి చెందుతుందన్న ప్రచారం నేపథ్యంలో తెలంగాణ, ఏపీ రాష్ట్రాల్లో చికెన్, గుడ్ల వినియోగం 40 శాతం మేర పడిపోయినట్లు పౌల్ట్రీ ఫెడరేషన్‌ ప్రతినిధులు ఆందోళన వ్యక్తం చేస్తున్నారు. ప్రస్తుతం చికెన్‌ కిలో లైవ్‌ బర్డ్‌ రూ.40కే విక్రయించాల్సి వస్తోందని ఆవేదన వెలిబుచ్చుతున్నారు. పక్షం రోజులు ముందు ఈ ధర రూ.60–80 ఉందన్నారు. నెలకు తెలంగాణలో 4.5 కోట్ల కిలోలు, ఏపీలో 4 కోట్ల కిలోల చికెన్‌ వినియోగం ఉంటుందని వారు వెల్లడిస్తున్నారు. ప్రస్తుతం వీటి అమ్మకాలు రెండు రాష్ట్రాల్లో 40 శాతం మేర తగ్గినట్లు అంచనా వేస్తున్నారు. 

అలాగే నిత్యం తెలంగాణలో 3.5 కోట్లు, ఏపీలో 3 కోట్ల గుడ్ల వినియోగం ఉండగా.. వీటి అమ్మకాలు సైతం 40 శాతం మేర పడిపోయినట్లు అంచనా. చికెన్, గుడ్ల వినియోగం అనూహ్యంగా తగ్గడం, ధరలు అమాంతం పడిపోవడంతో రూ.500 కోట్ల మేర నష్టం చవిచూడాల్సి వచ్చిందని పౌల్ట్రీ నిర్వాహకులు ఆందోళన వ్యక్తం చేస్తున్నారు. పౌల్ట్రీ రంగంపై ఇరు రాష్ట్రాల్లో సుమారు 50 వేల మంది ప్రత్యక్షంగా, మరో లక్ష మంది పరోక్షంగా ఆధారపడుతున్నారు. 

అదే సమయంలో కోవిడ్‌–19 వైరస్‌కు, చికెన్, గుడ్లతో ఎలాంటి సంబంధం లేదని వైద్య నిపుణులు స్పష్టం చేస్తున్నారు. చైనాలో విభిన్న భౌగోళిక, వాతావరణ పరిస్థితులు, సగం ఉడికిన (హాఫ్‌ బాయిల్డ్‌) ఆహార పదార్థాలను అధికంగా తీసుకోవడం తదితర కారణాలతో కోవిడ్‌ వైరస్‌ ఆ దేశంలో విజృంభిస్తోందన్నారు. మన దేశంలో ప్రస్తుతం పగటి ఉష్ణోగ్రతలు 34 డిగ్రీలకుపైగా చేరుకోవడం, ఆహార పదార్థాలను సుమారు 100 సెంటిగ్రేడ్‌ వరకు ఉడికించి తింటుండటంతో ఎలాంటి వైరస్‌ వ్యాప్తి చెందే అవకాశాలు లేవని స్పష్టం చేస్తున్నారు. 

కొందరు అదే పనిగా సోషల్‌ మీడియాలో చికెన్, గుడ్లతో ఈ వైరస్‌ సోకుతోందని అబద్ధపు ప్రచారం చేస్తున్నారు. కేంద్ర, రాష్ట్ర ప్రభుత్వాలు సైతం ఇది ముమ్మాటికి తప్పుడు ప్రచారమేనని.. చికెన్, గుడ్ల వినియోగంతో వైరస్‌ వ్యాప్తి చెందదని సర్క్యులర్‌ని జారీ చేశాయని పౌల్ట్రీ ఫెడరేషన్‌ ప్రతినిధులు తెలిపారు. 

ఆరోగ్య నిపుణుల అభిప్రాయం ప్రకారం సంపూర్ణ పోషకాహారమైన చికెన్, గుడ్ల వినియోగంతో మనుషుల్లో రోగ నిరోధక శక్తి పెరిగి సంపూర్ణ ఆరోగ్యవంతులు అవుతారు. చికెన్‌లో 21.39 శాతం, గుడ్లలో 12.49 శాతం మేర హైక్వాలిటీ ప్రొటీన్లు ఉంటాయి. ఇందులో ఉండే మినరల్స్‌ కూడా మానవ ఆరోగ్యానికి దోహదం చేస్తాయి. అందరూ నిర్భయంగా చికెన్, గుడ్లను వినియోగించవచ్చు.

చికెన్, గుడ్లు సంపూర్ణ పోషకాహారం. వీటితో ఎలాంటి వైరస్‌ వ్యాప్తిచెందదు. అందరూ అపోహలను, అబద్ధపు ప్రచారాలను వీడి చికెన్, గుడ్లను నిరభ్యంతరంగా తినొచ్చు. మానవ ఆరోగ్యానికి, ఎదుగుదలకు, పోషణకు ఇది చక్కటి ఆహారం. 

నిపుణులు ఎన్ని రకాలుగా భరోసా ఇస్తున్నా.. ప్రజలు మాత్రం మాంసం జోలికి ప్రత్యేకించి కోడిమాంసం జోలికి వెళ్లమంటే వెళ్లమని భీష్మించుకున్నారు. ఇదే పౌల్ట్రీ పరిశ్రమను ప్రస్తుతం వణికింపజేస్తోంది.

స‌మాజంలో అఘాయిత్యాల సంఖ్య రోజు రోజుకు పెరిగిపోతున్నాయి. దిశ ఘ‌ట‌న‌ నిందితుల‌ను ఎన్‌కౌంట‌ర్ చేసినా ముసుగు క‌ప్పి ఉన్న మాన‌వ మృగాలు మార‌ని ప‌రిస్థితులు క‌నిపిస్తున్నాయి. గ‌త వారం రోజుల క్రితం ఖ‌మ్మంలో సొంత కూతురుపై తండ్రి అత్యాచారం చేసిన ఘ‌ట‌నను మ‌రువ‌క ముందే భ‌ద్రాది కొత్త‌గూడెం జిల్లాలో మ‌రో దారుణం చోటు చేసుకుంది.

సొంత అన్న‌నే తన చెల్లిపై అత్యాచారానికి ఒడిగ‌ట్టి అనంత‌రం పురుగుల మందు తాపించి ఆత్మ‌హ‌త్య చేశాడ‌ని పాల్వంచ పోలీసు స్టేష‌న్‌లో కుటుంబ స‌భ్యులు ఫిర్యాదు చేశారు. కాగా, త‌ల్లిదండ్రులు పోలీసుల‌కు ఇచ్చిన ఫిర్యాదు ప‌త్రంలో పేర్కొన్న అస‌లు వివ‌రాలు ఇలా ఉన్నాయి. పాల్వంచ పోలీసు స్టేష‌న్ ప‌రిధిలోని జ్యోతిన‌గ‌ర్‌లో ఉంటున్న స‌ప్ప‌డి వెంక‌టి, రాధ‌మ్మ‌ల‌కు కుమారుడు రాంబాబు, కూమార్తె భూమిక ఉన్నారు. భూపాల‌ప‌ల్లిలో వివాహ కార్య‌క్ర‌మం ఉండ‌టంతో కుమార్తెను, త‌న సొంత అన్న సంర‌క్షిస్తాడ‌న్న ఉద్దేశంతో త‌ల్లిదండ్రులు అత‌ని వ‌ద్ద వ‌దిలి పెళ్లికి వెళ్లారు. దీంతో ఈ దారుణం చోటు చేసుకుంది.

త‌ల్లిదండ్రులు భూపాల‌ప‌ల్లిలో బంధువుల పెళ్లికి వెళ్లిన క్ర‌మంలో మ‌ద్యం మ‌త్తులో ఉన్న‌ అన్న రాంబాబు భూమిక‌పై  అత్యాచారానికి పాల్ప‌డ్డాడు. తానే కాకుండా తన మిత్రుడి చేత కూడా అత్యాచారం చేయించాడు. ఈ బాధాక‌ర విష‌యాన్ని త‌ట్టుకోలేక భూమిక  పురుగుల మందు తాగి ఆత్మ‌హ‌త్య చేసుకుంది.

కాగా, భూమిక‌కు జ‌న‌వ‌రి 9వ తేదీన నిశ్చితార్ధం జ‌రిగింది. ఈ క్ర‌మంలో అన్న రాంబాబుపై అత్యాచారానికి ఒడి గ‌ట్ట‌డం స‌మాజాన్ని క‌ల‌చివేస్తోంది. స్థానికులు గ‌మ‌నించి పాల్వంచ ప్ర‌భుత్వ ఆస్ప‌త్రికి త‌ర‌లించారు. భూమిక ఆరోగ్య ప‌రిస్థితి విష‌మించ‌డంతో అక్కడి నుంచి కొత్త‌గూడెం ప్ర‌భుత్వాస్ప‌త్రికి త‌ర‌లించారు. చికిత్స పొందుతూ భూమిక మృతి చెందిన‌ట్టు వైద్యులు తెలిపారు.

స‌మాజం సిగ్గుప‌డే చోటు చేసుకున్న ఈ ఘ‌ట‌న‌తో సొంత తండ్రినే కాదు.. సొంత అన్నాదమ్ముల‌ను కూడా న‌మ్మే ప‌రిస్థితిని లేకుండా చేసింది. త‌ల్లిదండ్రులు ఇచ్చిన ఫిర్యాదు మేర‌కు రాంబాబు, అత‌ని స్నేహితుడిని పోలీసులు అదుపులోకి తీసుకుని విచారిస్తున్నారు. వీలైనంత త్వ‌ర‌గా కేసు ద‌ర్యాప్తును పూర్తి చేసి నిందితుల‌కు క‌ఠిన శిక్ష ప‌డేలా చ‌ర్య‌లు తీసుకుంటామ‌ని వారు తెలుపుతున్నారు. 

చదవండి : తండ్రి కాదు... మృగాడు... కూతురితో అసభ్య ప్రవర్తన

మారిన ప‌రిస్థితుల‌తో చాలా మంది స‌మ‌తుల్య ఆహారం తిన‌లేక‌పోతున్నారు. టైమ్ లేదంటూ రెడీమెడ్ ఫుడ్‌కు బాగా అల‌వాటు ప‌డుతున్నారు. గ‌తంలో ఇంట్లో పొయ్యి వెలిగించ‌క‌పోతే పూట గడిచేది కాదు. కానీ, ప్ర‌స్తుతం ఆక‌లివేస్తే ఫోన్ ప‌ట్టుకుంటే స‌రిపోతుంది. అర‌గంట‌లోపే ఆర్డ‌ర్ చేసిన ఫుడ్ మ‌న చేతిలో ఉంటుంది.

మ‌రోవైపు ఇది తింటి లావైపోతాం. అది తింటే మంచిది కాదంటూ డైటింగ్ చేసేవాళ్లు తినాల్సింది తిన‌క తిన‌కూడ‌నివి తెలుసుకోకుండానే తినేస్తున్నారు. దీంతో ప్రొటీన్ల లోపం ఇండియాలో అత్య‌ధికంగా ఉంటోంది. ఇటీవ‌ల నిల్స‌న్ స‌ర్వేలో తెలిసిన విష‌యాలు డేంజ‌ర్ బెల్స్‌ను సూచిస్తున్నాయి

రాష్ట్రంలో 60 శాతం మంది జ‌నాలు ప‌ప్పులు తిన‌క‌పోవ‌డం వ‌ల్లే ఎమినో ఆసిడ్, మేథీనినే త‌గ్గుతుంద‌ని, దీంతో శ‌రీరంలో ఉన్న క‌ణ‌జాలాల ఎదుగుద‌ల ఆగిపోతుంద‌ని స‌ర్వే చెప్పింది. పోష‌క విలువ‌లుగ‌ల ఆహారం, అందులోను ప‌ప్పులు, ధాన్యాలు, పాల ఉత్ప‌త్తులు నాన్‌వెజ్ ఐటెమ్స్‌ను 5:1 శాతంతో తీసుకుంటే బెట‌ర్ అంటోంది స‌ర్వే రిపోర్టు.

ఒక కిలో బ‌రువుకు ఒక గ్రాము ఫుడ్ అవ‌స‌ర‌మ‌ని స‌ర్వే చెబుతోంది. ఇక ఫిజిక‌ల్ యాక్టివిటీస్ ఎక్కువ‌గా చేసేవారికి, గ‌ర్భ‌వ‌తుల‌కు ప్రొటీన్ల‌ను ఎక్కువ‌గా తీసుకోవాల‌ని స‌ర్వే సూచిస్తోంది. హైద‌రాబాదీలు  70 శాతం  మంది ప్రొటీన్ల లోపంతో ఇబ్బందులు ప‌డుతున్న‌ట్టు స‌ర్వే తేల్చింది. ప్రొటీన్ ఫుడ్‌ను సిటీ జనం బాగా త‌గ్గించిన‌ట్టు బ్యూటీషియన్స్‌ సైతం చెబుతున్నారు.

నాన్‌వెజ్‌ను ఎక్కువ‌గా తీసుకోక‌పోవ‌డం, వెజ్‌లోనూ ప్రొటీన్లు త‌క్కువ మొత్తంలో తీసుకుంటున్న‌ట్లు బ్యూటీషియన్స్‌ చెబుతున్నారు. దీంతో ప్రొటీన్లు లేపించి ఆరోగ్య స‌మ‌స్య‌లు వ‌స్తున్న‌ట్టు వివ‌రించారు. అంతేగాక పిల్ల‌ల్లో ఎదుగుద‌ల లేకుండా పోతుందంటున్నారు. పెద్ద‌ల‌కు ఒబేసిటీ, హార్మోన్ల లోపం పీసీఓడీ వంటి స‌మ‌స్య‌ల బారిన ప‌డుతున్నార‌ని చెబుతున్నారు బ్యూటీషియన్స్‌.

మాంసాహారం తినేవారిక‌న్నా శాఖాహారం తినేవారు ప్రొటీన్ల లోపానికి గుర‌వుతున్నార‌ని స‌ర్వే తేల్చింది. స‌ర్వేలో పాల్గొన్న వారికి అస‌లు రోజుకు ఎంత మేర ప్రొటీన్లు తీసుకోవాలో కూడా తెలియ‌దని తేలింది. హైద‌రాబాద్, చెన్నై, బెంగ‌ళూరు వంటి మెట్రో న‌గ‌రాల్లోని సిటిజ‌న్లు ఎక్కువ‌గా ప్రొటీన్ల లోపంతో ఇబ్బంది ప‌డుతున్నార‌ని స‌ర్వే తెలిపింది.

ప్రొటీన్ల లోపంతో ఇమ్యూనిటీ ప‌వ‌ర్ త‌గ్గిపోతుంద‌ని స‌ర్వేలు తేల్చాయి. పండ్లు, కూర‌గాయ‌లు, ప‌ప్పు దినుసులు తింటే ప్రొటీన్లు అందిన‌ట్లేన‌ని అనుకుంటే పొర‌పాటేన‌ని, పాల ఉత్ప‌త్తులు, ఆకు కూర‌లు, సోయాబీన్ల‌లో ప్రొటీన్లు అధికంగా ఉంటాయి క‌నుక వాటిని డైలీ ఆహారంలో తీసుకోవాల‌ని వైద్యులు సూచిస్తున్నారు.