చైనా-భారత్ సరిహద్దుల్లో యుద్ధవాతావరణం కనిపిస్తోంది. తీవ్ర ఉద్రిక్తతల నేపథ్యంలో ఆ దేశానికి సంబంధించిన 59 యాప్స్ పై కేంద్ర ప్రభుత్వం నిషేధం విధించింది. ఈ యాప్స్ కు సంబంధించి గూగుల్ ఈమధ్యే కీలక ప్రకటన చేసింది. భారత ప్రభుత్వం నిషేధించిన యాప్స్ ను గూగుల్ ప్లేస్టోర్ లోనే ఉంచామని... అయితే ఇండియాలో అందుబాటులో లేకుండా తాత్కాలికంగా బ్లాక్ చేశామని తెలిపింది.  దీనికి సంబంధించిన సమాచారాన్ని కూడా యాప్స్ డెవలపర్లకు అందించామని తెలిపింది. దీంతో టిక్ టాక్ అందుబాటులో లేకుండా పోయింది. 

టిక్ టాక్ పై నిషేధంతో దేశీయ యాప్ లకు ఆదరణ పెరుగుతోంది. చిన్న పిల్లల దగ్గర నుంచి అన్ని వయసుల వారు టిక్ టాక్ కి బానిసలుగా మారిపోయారు. ఎవరికి నచ్చిన రీతిలో వారు వీడియోలను తీసి పోస్ట్ చేసి వచ్చిన లైక్ లను చూసుకుంటూ మురిసిపోయారు. కేంద్రం నిషేధించిన యాప్ లలో టిక్ టాక్ యాప్ కూడా ఉండడంతో చాలా మంది టిక్ టాక్ ఫాలోవర్స్ కి షాక్ తగిలినంత పనైంది. ఇక తమ టాలెంట్ ని ప్రజలకు ఏ విధంగా చూపించాలి అని బాధపడుతున్న వేళ తెలంగాణకు చెందిన ఓ యువకుడు అచ్చం టిక్ టాక్ లాంటి ఓ యాప్ ను రూపొందించాడు.

ఈయాప్ కు 'చట్‌పట్‌' అనే పేరును కూడా పెట్టాడు. టిక్ టాక్ యాప్ ను ఏ విధంగానైతే ఉపయోగిస్తారో అచ్చం అదే విధంగా ఈ ఛట్ పట్ యాప్ ఉపయోగించవచ్చంటున్నాడు. ఈ చట్‌పట్‌ యాప్ కు ప్లేస్టోర్‌లో డిమాండ్‌ బాగా పెరిగింది. టిక్ టాక్ ఆగిపోవడంతో చట్ పట్ యాప్‌ ప్లేస్టోర్‌ ట్రెండింగ్‌ సోషల్‌ క్యాటగిరీలో టాప్ లో వుంది. .ఈ యాప్‌ జూన్‌ 29న ప్లేస్టోర్‌ లోకి వచ్చింది. ఆరురోజుల్లోనే వేలాదిమంది దీనిని డౌన్‌లోడ్‌ చేసుకున్నారు. ఈ చట్ పట్ యాప్ కు యూజర్లు మంచి రేటింగ్ ఇస్తున్నారు. చట్ పట్ మేడిన్ ఇండియా పేరుతో సోషల్ మీడియాలో ట్రెండ్ అవుతోంది. 

నిద్రలేచింది మొదలు నిద్రపోయేవరకూ.. అంతెందుకు నిద్రలో కూడా స్మార్ట్ ఫోన్ చూడకుండా ఉండలేని పరిస్థితి ఇది. స్మార్ట్ ఫోన్లో అనేక యాప్ లు వచ్చిపడుతున్నాయి. వీటికి తోడు సోషల్ మీడియా ప్లాట్ ఫాంలు కూడా అనేకం వున్నాయి. ఫేస్ బుక్ తో పాటు వాట్సాప్ వినియోగం కూడా బాగా పెరిగింది. తాజాగా భారత్ టిక్ టాక్ తో సహా 59 చైనీస్ యాప్స్ పై నిషేధం విధించింది. 

వినియోగదారుల నుంచి వస్తున్న ఆదరణను దృష్టిలో ఉంచుకుని వాట్సాప్‌లో త్వరలో మరో ఐదు కొత్త ఫీచర్లు వస్తున్నట్టు తెలుస్తోంది. ఈ మేరకు కంపెనీ ఒక  ప్రకటన విడుదల చేసింది. వెబ్​ వాట్సాప్​కు డార్క్ మోడ్​, క్వాలిటీ వీడియో కాల్స్​, కైఓఎస్​కు మాయమైపోయే స్టేటస్​, యానిమేటెడ్​ స్టిక్కర్స్, క్యూఆర్​ కోడ్స్‌లను త్వరలోనే అందుబాటులోకి తెస్తామని సంస్థ ప్రకటించింది.

వెబ్​ వాట్సాప్​కు డార్క్ మోడ్​: ఇదివరకు ఆండ్రాయిడ్, ఐఓఎస్ లకు మాత్రమే డార్క్ మోడ్ అందుబాటులో ఉండగా ఇప్పుడు వెబ్ వర్షన్ కు కూడా అందుబాటులోకి రానుంది. 

క్వాలిటీ వీడియో కాల్స్: వీడియో కాల్స్ మాట్లాడుతున్నప్పుడు స్క్రీన్ పై నొక్కితే ఆ భాగంలో క్లారిటీ ఎక్కువ వచ్చేలా రూపొందిస్తున్నారు. 

యానిమేటెడ్​ స్టిక్కర్స్ : వాట్సాప్ లో మరింత ఫన్ కోసం ఫన్నీ యానిమేటెడ్‌ స్టిక్కర్లు రానున్నాయి. ఈ స్టిక్కర్లు పిల్లల్ని కూడా అలరించనున్నాయి. 

కైఓఎస్​కు మాయమైపోయే స్టేటస్: స్టేటస్ దానంతట అదే మాయమైపోయే ఫీచర్ ఇప్పటికే ఆండ్రాయిడ్, ఐఓఎస్​లలో ఉండగా.. ఇకపై కైఓఎస్​కు కూడా అందుబాటులోకి రానుంది. 

క్యూఆర్​ కోడ్స్ :క్యూ ఆర్ కోడ్ ద్వారా వ్యక్తి కాంటాక్ట్ ను స్కాన్ చేసి, సేవ్ చేసుకునే సదుపాయం వుంటుంది. ఎప్పుడైనా అతనితో మాట్లాడాలంటే మనం సేవ్ చేసుకున్న వివరాలనుంచి మాట్లాడుకునే అవకాశం ఉంటుంది

జెఫ్ బెజోస్ గుర్తున్నారా.. ప్రపంచ దిగ్గజ సంస్థల్లో ఒకటైన అమెజాన్ వ్యవస్థాపకుడు. 171.6 బిలియన్ డాలర్ల రికార్డు సంపదతో తన పాత రికార్డుని తనే బ్రేక్ చేశాడాయన. గత ఏడాది మెకెంజీతో విడాకుల పరిష్కారంలో భాగంగా అమెజాన్ లో తన వాటాలో నాలుగింట ఒక వంతును వదులుకున్నాడు. అనంతరం ఆయన సంపద  172  బిలియన్ డాలర్ల  వద్దకు చేరింది. 

అమెజాన్ షేర్లు అమాంతం పెరిగిపోయాయి. ప్రస్తుతం 2,879 డాలర్లకు చేరింది. దీంతో ప్రపంచ కుబేరుడి బెజోస్ ఆదాయం 171.6 బిలియన్ డాలర్లకు పెరిగింది. బ్లూమ్‌బెర్గ్ బిలియనీర్స్ ఇండెక్స్ ప్రకారం, సెప్టెంబర్ 4, 2018 నాటికి బెజోస్ సంపద 167.7 బిలియన్ డాలర్ల వద్ద రికార్డు స్థాయిని తాకింది. తాజాగా తన రికార్డును తనే బ్రేక్ చేశారు. కరోనా మహమ్మారి, ఆర్థిక మాంద్యం పరిస్థితులున్న ఈ ఏడాదిలోనే 56.7 బిలియన్లను ఆర్జించాడు. కరోనా సంక్షోభ సమయంలో ముందుండి పనిచేస్తున్న ఉద్యోగులకు వన్ టైం బోనస్ కింద 500 మిలియన్ డాలర్లు చెల్లించనున్నట్టు  ప్రకటించారు. దీంతో ఆయన ఉద్యోగులు పండుగ చేసుకుంటున్నారు. 

విడాకుల తర్వాత మెకంజీ ఆదాయం 56.9 బిలియన్ డాలర్లకు చేరింది. ఆమె ఆదాయం పెరగడంతో బ్లూమ్‌బెర్గ్ ర్యాంకింగ్‌లో 12వ స్థానాన్ని సాధించారు. అంతేకాదు  ప్రపంచంలో రెండవ సంపన్న మహిళగా నిలిచారు.  మిగిలిన బిలియనీర్లలో ఎక్కువ మంది టెక్ రంగానికి చెందినవారుండడం విశేషం. 

వీరిలో టెస్లా సీఈవో ఎలోన్ మస్క్ సంపద జనవరి 1 నుండి 25.8 బిలియన్ డాలర్లు పెరిగింది. జూమ్ వీడియో కమ్యూనికేషన్స్ వ్యవస్థాపకుడు ఎరిక్ యువాన్ సంపద దాదాపు నాలుగు రెట్లు పెరిగి 13.1 బిలియన్ డాలర్లు చేరింది. కరోనా కారణంగా జనం తీవ్ర ఇబ్బందులు పడుతుండడంతో ప్రపంచ కుబేరుల సంపద మాత్రం కొంచెం పెరగడం విశేషం. కొంతమంది మాత్రం తమ సంపదను కోల్పోయారు. 

తిండి తిన‌కుండా ఉంటాం కానీ టిక్‌టాక్ లేకుండా ఉండ‌లేం అంటున్నారు కొంద‌రు టిక్‌టాక్ యూజ‌ర్లు. అందుకే టిక్‌టాక్ స‌హా 59 చైనీస్ యాప్‌లను ప్ర‌భుత్వం నిషేదించ‌డంతో ముఖ్యంగా ప‌లువురు సెల‌బ్రిటీలు అయోమ‌యంలో ప‌డిపోయారు. ఇప్ప‌టికే ఈ యాప్‌ను భార‌త్‌లో దాదాపు 20 కోట్ల మంది వినియోగిస్తున్నారు. దీంతో ఉన్న‌ప‌లంగా తీసేయాలంటే ఇంకోటి రిప్లేస్‌ చేయాల్సిందే అనుకున్నారేమో వెంట‌నే టిక్‌టాక్ ప్ర‌త్యామ్నాయం ఏంటా అని శోధించారు. అదృష్ట‌వ‌శాత్తూ మ‌న భార‌తీయులు త‌యారు చేసిన 'చింగారి' యాప్ క‌ళ్లెదుట ప్ర‌త్య‌క్ష‌మయ్యింది. ఇంకేముంది గంటలోనే ఈ యాప్‌ను ల‌క్ష‌మంది దాకా డౌన్‌లోడ్ చేసుకున్న‌ట్లు తెలుస్తోంది. కాగా 20 లక్షల వ్యూస్‌తో చింగారి రికార్డు సృష్టించింది కూడా.

షార్ట్ వీడియో స‌ర్వీస్‌తో అచ్చం టిక్‌టాక్ మాదిరే ఉన్న ఈ యాప్‌పై ప్ర‌స్తుతం భార‌తీయులు మ‌క్కువ చూపిస్తున్నారు.  తెలుగు, ఇంగ్లీష్, హిందీ, బెంగాలీ,  గుజరాతీ, మరాఠీ, కన్నడ, పంజాబీ, మలయాళం, తమిళం భాష‌ల్లో ఈయాప్ అందుబాటులో ఉంది. దీంతో స్వ‌దేశీ ప‌రిఙ్ఞానంతో రూపొందింన 'చింగారి' యాప్‌ను ప్రోత్స‌హించాలంటూ ప‌లువురు అభిప్రాయ‌ప‌డుతున్నారు. పారిశ్రామికవేత్త ఆనంద్ మ‌హింద్రా సైతం చింగారి యాప్‌ను డౌన్‌లోడ్ చేసి దాని ప్ర‌త్యేక ఫీచ‌ర్స్‌ను వివ‌రించారు. స్వ‌దేశీ ప‌రిఙ్ఞానంతో రూపుదిద్దుకున్న చింగారి యాప్ రూప‌క‌ర్త‌ల‌పై ప్ర‌శంస‌లు కురిపిస్తూ ట్వీట్ చేశారు. మ‌రో విశేషం ఏంటంటే ఆనంద్ మ‌హింద్రా ఇప్ప‌టివ‌ర‌కు టిక్‌టాక్ యాప్‌ను మునుపెన్న‌డూ డౌన్‌లోడ్ చేసుకోలేదు. 

బెంగుళూరుకు చెందిన బిస్వాత్మ నాయక్‌,  సిద్ధార్థ్ గౌతమ్ గ‌తేడాది చింగారి యాప్‌ను రూపొందించారు. అయితే మ‌నోళ్ల‌కు విదేశీ వ‌స్తువులు, యాప్‌లపై మోజెక్కువ కాబ‌ట్టి చింగారి యాప్ ఆద‌ర‌ణ‌కు నోచుకోలేదు. కానీ తాజాగా 59 చైనా యాప్‌ల‌పై ప్ర‌భుత్వం నిషేదం విధించ‌డంతో చింగారి యాప్ డౌన్‌లోడ్స్ పెరిగాయి. ఇప్ప‌టికే 1 మిలియ‌న్ మార్కును దాటేసి గూగుల్ ప్లే స్టోర్‌లో అగ్ర‌స్థానానికి చేరుకుంది. అంతేకాకుండా ప‌లు సామాజిక ప్లాట్‌ఫామ్‌లు సైతం చింగారిలో పెట్టుబుడులు పెట్టేందుకు ఆస‌క్తి చూపిస్తున్నారని ప్రోగ్రామ‌ర్ నాయ‌క్ తెలిపారు.  

59 చైనీస్ యాప్‌ల‌పై నిషేధం విధిస్తూ కేంద్రం తీసుకున్న నిర్ణ‌యాన్ని చింగారి యాప్ స‌హ వ్య‌వ‌స్థాప‌కుడు సుమిత్ ఘోష్ స్వాగతించారు. డేటా త‌స్క‌రించి గూఢ‌చార్యానికి పాల్ప‌డ్డ యాప్‌ను భార‌త్ తిరిగి త‌న గూటికి చేర్చింది. ఎట్ట‌కేల‌కు ఈ బ్యాన్ జరిగినందుకు మ‌కు సంతోషంగా ఉంద‌న్నారు.

భారత్‌లో టిక్‌టాక్‌తో సహా 59 చైనీస్‌ యాప్‌లపై కేంద్రం సోమవారం నిషేధం విధించిన సంగతి తెలిసిందే. దీంతో గూగుల్‌ ప్లే స్టోర్,యాప్‌ స్టోర్‌ల‌లో టిక్‌టాక్‌తో పాటు మిగిలిన కొన్ని యాప్‌లను తొలగించారు. మరోవైపు ఆయా ఫోన్లలో ఇన్​స్టాల్ అయి ఉన్న యాప్స్‌ మాత్రం మామూలుగా పనిచేస్తూ వచ్చాయి. అయితే కొద్దిసేపటి నుంచి మొబైల్‌ ఫోన్లలో, డెస్క్‌టాప్‌ వర్షన్‌లో టిక్‌టాక్‌ యాప్‌ సేవలు నిలిచిపోయాయి. దేశవ్యాప్తంగా టిక్‌టాక్‌ యాప్‌ పూర్తిగా ఆఫ్‌లైన్‌లోకి వెళ్లిపోయింది. టిక్‌టాక్‌ యాప్‌ ఓపెన్‌ చేస్తున్న వినియోగదారులకు.. నెట్‌వర్క్‌ ఎర్రర్‌ కనిపిస్తుంది. 

చైనా యాప్‌లను గంపగుత్తగా భారత ప్రభుత్వం నిషేధించడం, ఈలోపు చింగారి అనే దేశీయ ప్రత్యామ్నాయ యాప్ ఉనికిలోకి రావడంతో సంతోషం పట్టలేని భారతీయులు కేవలం గంటలోపే లక్ష డౌన్‌లోడ్లతో, 20 లక్షల వ్యూస్‌తో చింగారి యాప్‌కు స్వాగతం పలికారు. చైనా యాప్‌లపై నిషేధం విధించకముందే 30 లక్షల సార్లు టిక్ టాక్‌ను డౌన్ లోడ్ చేసుకున్నారు.

భారత్, చైనా మధ్య నెలకొన్న ఉద్రిక్త పరిస్థితుల సెగ ఇప్పుడు ఇండియన్ ప్రీమియర్ లీగ్ (ఐపీఎల్)‌ని కూడా తాకింది. లఢక్‌లోని గాల్వన్ సరిహద్దు దగ్గర ఇటీవల చైనా సైనికుల దుశ్చర్య కారణంగా 20 మంది భారత సైనికులు అమరులయ్యారు. దాంతో.. చైనా తీరుని నిరసిస్తూ ఆ దేశానికి చెందిన 59 యాప్‌లపై భారత ప్రభుత్వం నిషేధం విధించింది. ఈ నేపథ్యంలో.. ఐపీఎల్ స్ఫాన్సర్స్ విషయంలో భారత క్రికెట్ నియంత్రణ మండలి (బీసీసీఐ) ఏం నిర్ణయం తీసుకోబోతోంది..? అనే ఆసక్తి సర్వత్రా నెలకొంది.

ఐపీఎల్ టైటిల్ స్ఫాన్సర్‌గా చైనాకి చెందిన వివో ఉంది. బీసీసీఐతో 2018లో ఐదేళ్లకాలానికి రూ. 2,199 కోట్లతో ఒప్పందం కుదుర్చుకున్న వివో.. ఏటా రూ. 440 కోట్లు చెల్లిస్తోంది. దిన్ని వీలైనంత త్వరగా క్యాన్సిల్ చేసుకోవాలని బీసీసీఐకి కింగ్స్ ఎలెవన్ పంజాబ్ సహ- యజమాని నెస్ వాడియా సూచించాడు. 

ఐపీఎల్‌తో వివోనే కాదు.. పేటీఎం, స్విగీ, డ్రీమ్ ఎలెవన్ తదితర కంపెనీలు కూడా అగ్రిమెంట్‌ కుదుర్చుకున్నాయి. దాంతో.. ఇప్పటికిప్పుడు అగ్రిమెంట్‌లను రద్దు చేసుకుంటే రూ.వేల కోట్లని బీసీసీఐ నష్టపోవాల్సి ఉంటుంది.ఐపీఎల్‌లో చైనా కంపెనీలతో ఉన్న అగ్రిమెంట్‌లను బీసీసీఐ వదులుకోవాలి. ముందు దేశం.. తర్వాతే డబ్బు అని బీసీసీఐ ఆలోచిస్తోంది. ఐపీఎల్ అంటే ఇండియన్ ప్రీమియర్ లీగ్.. అంతే తప్ప చైనీస్ ప్రీమియర్ లీగ్ కాదు అనే భావనతో ముందుకు సాగుతుంది. ఆ కంపెనీలతో ఒప్పందాల్ని త్యజించడం ద్వారా బీసీసీఐ అందరికీ ఆదర్శంగా నిలవాలని ఐపిఎల్ ప్రాంఛైజిలు అనుకుంటున్నాయి. 

ఇప్పటికిప్పుడు స్ఫాన్సర్లని వదులుకుంటే వెంటనే దొరకడం కష్టం..  కానీ.. భారత్‌లోనే ఆ స్ఫాన్సర్లని భర్తీ చేయగల కంపెనీలు చాలా ఉన్నాయి. దేశాన్ని, ప్రభుత్వాన్ని.. అన్నికంటే మించి దేశం కోసం ప్రాణాల్ని పెట్టి పోరాడుతున్న సైనికుల్ని మనం గౌరవించాలి’’ అని నెస్ వాడియా సూచించాడు.

భారత్‌లో టిక్‌టాక్‌ని బ్యాన్ చేయడంతో.. ఆస్ట్రేలియా సీనియర్ ఓపెనర్ డేవిడ్ వార్నర్‌పై సోషల్ మీడియాలో సెటైర్లు పేలుతున్నాయి. చైనాతో సరిహద్దు దగ్గర నెలకొన్న ఉద్రిక్త పరిస్థితులు కారణంగా ఆ దేశానికి చెందిన 59 యాప్‌లపై భారత ప్రభుత్వం నిషేధించింది. ఇందులో టిక్‌‌టాక్ యాప్ కూడా ఉంది.

కరోనా వైరస్ కారణంగా గత మార్చి నుంచి క్రికెట్ సిరీస్‌లన్నీ రద్దు కావడంతో.. ఇంట్లోనే ఉంటున్న డేవిడ్ వార్నర్.. వరుస టిక్‌టాక్ వీడియోలతో అభిమానుల్ని అలరించాడు.  ముఖ్యంగా తెలుగులో కొన్ని ఫేమస్ డైలాగ్స్, సాంగ్స్ తో అదరగొట్టాడు.

తెలుగులో మహేష్ బాబు, అల్లు అర్జున్  సినిమాలోని పాటలకు, డైలాగ్స్ కి టిక్ టాక్ వీడియోస్ చేశాడు. ఆ తర్వాత బాలీవుడ్, తమిళ సినిమాల్లోని పాటలకి కూడా చేశాడు.టిక్‌టాక్ వీడియోల కారణంగా అతని పాపులారిటీ కూడా బాగా పెరిగింది. ఈ క్రమంలో కెప్టెన్ విరాట్ కోహ్లీని కూడా టిక్‌టాక్ వీడియో చేయాల్సిందిగా తొలుత సూచించిన వార్నర్.. ఆ తర్వాత సెటైర్లు కూడా పేల్చాడు. కానీ.. కోహ్లీ మాత్రం మౌనంగా ఉండిపోయాడు. 

అయితే.. వార్నర్‌ని ఆదర్శంగా తీసుకుని ఆస్ట్రేలియా మరో ఓపెనర్ అరోన్ ఫించ్ కొన్ని టిక్‌టాక్ వీడియోలు చేశాడు. ఇలా వారు చేసిన టిక్ టాక్ ఇప్పుడు ఇండియాలో బ్యాన్ చెయ్యడంతో సోషల్ మీడియా లో జోకులు వేస్తున్నారు.

చైనా దూకుడుకి కళ్ళెం వేయడంలో భాగంగా కేంద్రం కీలక నిర్ణయం తీసుకుంది. ప్రపంచవ్యాప్తంగా పాపులారిటీ పొందిన టిక్‌టాక్‌తో సహా 59 యాప్స్ ని కేంద్రం నిషేధించిన సంగతి తెలిసిందే. దీంతో టిక్ టాక్ ను గూగుల్‌ ప్లేస్టోర్, యాపిల్‌ యాప్‌ స్టోర్‌‌ నుంచి తొలగించాయి. కేంద్ర ప్రభుత్వ ఆదేశాల మేరకు గూగుల్‌, యాపిల్‌ మంగళవారం ఈ నిర్ణయం తీసుకున్నాయి. టిక్‌టాక్‌, హెలో, షేర్‌ ఇట్‌తో సహా 59 చైనీస్‌ యాప్స్‌ను నిషేధిస్తూ చైనాకు భారత్‌ షాకిచ్చింది. 

దేశ సార్వభౌమాధికారం, సమగ్రత, రక్షణ, ప్రజాభద్రత దృష్ట్యా ఈ యాప్‌లపై నిషేధం విధిస్తున్నట్టు కేంద్ర సర్కారు సోమవారం ప్రకటించిన విషయం తెలిసిందే. చైనా కుట్రలను మోడీ సర్కారు ఈ విధంగా తిప్పికొట్టింది. చైనా కంపెనీలతో సంబంధం ఉన్న 59 యాప్‌లను మోదీ ప్రభుత్వం నిషేధించింది. కేంద్ర సమాచార, సాంకేతిక శాఖ ఈ మేరకు ఆయా యాప్‌లను నిషేధిస్తూ ఉత్తర్వులను జారీ చేసింది.

దేశ భద్రత, ప్రజల డేటాకు రక్షణ కల్పించాలనే ఉద్దేశంతో తాము ఈ నిర్ణయం తీసుకున్నామని కేంద్ర ప్రభుత్వం వెల్లడించింది. అయితే ప్రజలు దీన్ని మోదీ ”డిజిటల్‌ స్ట్రైక్‌”గా చెప్పుకుంటున్నారు. భారత్‌–చైనా సరిహద్దుల్లో ఉద్రిక్తతల నేపథ్యంలో కేంద్ర ప్రభుత్వం ఈ సంచలన నిర్ణయం తీసుకుంది. గ్లోబల్‌ వెబ్‌ ఇండెక్స్‌ లెక్కల ప్రకారం గతేడాది జూన్ నాటికి భారతదేశంలో 12  కోట్ల మంది నెలవారీ టిక్‌టాక్ వినియోగదారులు ఉన్నారు. తమ యాప్‌ను నిషేధించిన నేపథ్యంలో  తమ వివరణ వినడానికి ప్రభుత్వం అంగీకరించిందని టిక్‌టాక్‌ ఇండియా తెలిపింది.  భారత్ మార్కెట్ లేకుంటే టిక్ టాక్ ఎంతో నష్టపోతుందని. గతంలో నిషేధం విధించినప్పుడే కేంద్రానికి అభ్యర్ధనలు పంపి కోర్టుద్వారా పునరుద్ధరణ పొందిందని నిపుణులు చెబుతున్నారు. ఇప్పుడా పరిస్థితి వుంటుందా అనేది ఇతమిద్థంగా చెప్పలేకపోతున్నారు. 

భారత్ ఎలక్ట్రానిక్స్ అండ్ ఐటీ శాఖ సంచలన నిర్ణయం తీసుకుంది. దేశవ్యాప్తంగా అందుబాటులో వున్న చైనాకు చెందిన 59 యాప్ లపై నిషేధం విధించింది. అందులో షార్ట్ వీడియోలు తయారుచేసి షేర్ చేసుకొనే ఎంటర్ టైన్ మెంట్ యాప్ టిక్ టాక్ పై భారత ప్రభుత్వం నిషేధం విధించింది.గాల్వన్ లోయలో భారత సైనికుల పట్ల వ్యవహరించిన తీరుకి నిరసనగా బ్యాన్ చైనా ఉద్యమం ఊపందుకుంది. చైనా దూకుడుకు కళ్లెం వేయాలని దేశమంతా డిమాండ్ వస్తోంది. ఈ నేపథ్యంలో సరిహద్దులతో పాటు దేశంలో హవా కొనసాగిస్తున్న విదేశీ యాప్ లపై నిఘా పెంచాలని కేంద్రానికి ఇంటెలిజెన్స్ అధికారులు సూచించడంతో చర్యలు తీసుకుంది. దేశంలో చైనాకు చెందిన 59 మొబైల్ అప్లికేష‌న్ల‌ు పనిచేస్తున్నాయి, వీటిపై నిషేధం విధించాల‌ని లేదా ప్ర‌జ‌లు వాటిని వాడ‌కుండా చూడాల‌ని నిఘా వర్గాలు ఈమధ్యే కేంద్రానికి సిఫార‌సు చేసినట్టు తెలుస్తోంది. 

ఈ మొబైల్ అప్లికేషన్లు, సోషల్ మీడియా యాప్ ల దేశ గోప్యతకు భంగం కలిగించేలా వున్నాయని, ప్రస్తుత పరిస్థితుల్లో చైనాకు అవకాశం ఇవ్వకుండా భారత సార్వభౌమత్వానికి భంగం కలిగించకుండా చూసుకోవాల్సిన అవసరం ఉంది. దీనికి అనుగుణంగా కేంద్రం ఈ యాప్స్ పై నిషేధం విధించింది. ఈ జాబితాలో అనేక చైనా యాప్స్ వున్నాయి. 

చైనాకు ధీటైన సమాధానం.. ఆ యాప్‌‌లపై నిషేధం?

కేంద్రం నిషేధం విధించిన యాప్స్ ఇవే...

కరోనా వైరస్ కారణంగా జనమంతా ఇళ్ళకే పరిమితం అయ్యారు. షాపులకు వెళ్లి వస్తువులు కొనడం లాక్ డౌన్ సడలింపుల తర్వాతే ఆన్ లైన్ షాపింగ్ ప్రారంభమయింది. ఈ నేపథ్యంలో ఈ-కామర్స్‌ దిగ్గజం అమెజాన్‌ పెద్దఎత్తున తాత్కాలిక ఉద్యోగాలకు అభ్యర్ధుల నుంచి దరఖాస్తులు కోరుతోంది.

హైదరాబాద్‌ సహా దేశంలోని 11 ప్రధాన నగ రాల్లో 20వేల మంది తాత్కాలిక ఉద్యోగుల్ని నియమించనున్నట్టు తెలిపింది. దీని ద్వారా ఎక్కడికి వెళ్లాల్సిన పనిలేదు, మీ ఇంటి నుంచే తమ వీలును బట్టి భారత్‌తో పాటు అమెజాన్‌ అంత ర్జాతీయ కస్టమర్లకు సేవలు అందించాల్సి ఉంటుంది. ఇంటర్మీడియట్‌ పాసై ఇంగ్లీషు, ఆయా ప్రాంతీయ భాషా నైపుణ్యాలు ఉన్న వ్యక్తులు ఈ ఉద్యోగాలకు అర్హులు. ఈ ఉద్యోగాల కాలపరిమితి ఆరు నెలలే అయినా, అవసరాన్ని బట్టి కొంతమందిని పర్మినెంట్‌ చేసే అవకాశం ఉందని అమెజాన్ ప్రకటించింది. 

ప్రపంచవ్యాప్తంగా లక్షలాదిమందిని అమెజాన్ రిక్రూట్ చేసుకుంటోంది. డిమాండ్ కు తగ్గట్లు సకాలంలో వస్తువులను సరఫరా చేసేందుకు కంపెనీ చర్యలు చేపట్టింది. రానురాను ఆన్ లైన్ షాపింగ్ మరింత ముందుకి వెళ్లనుంది. కరోనా వేగంగా వ్యాప్తి చెందుతున్న నేపథ్యంలో ఇప్పటికే చాలా దేశాల్లో షట్ డౌన్ పరిస్థితి నెలకొంది. వైరస్ భయంతో ప్రజలందరూ ఇంటికే పరిమితమవుతున్నారు. ఇలాంటి పరిస్థితుల్లో ఇంట్లోకి అవసరమైన వస్తువులపై జనం ఆన్ లైన్ సైట్లపైనే ఆధారపడుతున్నారు. దీంతో డిమాండ్ పెరిగిపోవడంతో అమెజాన్ అదనంగా వర్కర్లను నియమించుకుంటోంది.

నోట్ల రద్దు అనంతరం దేశంలో డిజిటల్ లావాదేవీలు బాగా పెరిగాయి. కేంద్రం కూడా ఈ-లావాదేవీలకు ప్రాధాన్యత ఇస్తోంది. తాజాగా గూగుల్ పే పై రిజర్బుబ్యాంక్ నిషేధం విధించిందని వార్తలు వస్తున్నాయి. అయితే, భారత్‌లో గూగుల్‌ పే యాప్‌ను ఆర్‌బీఐ బ్యాన్‌ చేసిందంటూ సోషల్‌ మీడియాలో షికార్లు చేస్తున్న పుకార్లపై నేషనల్‌ పేమెంట్స్‌ కార్పోరేషన్‌ ఆఫ్‌ ఇండియా(ఎన్‌పీసీఐ) క్లారిటీ ఇచ్చింది. గూగుల్‌ పే యాప్‌ను ఇండియాలో బ్యాన్‌ చేయలేదని, సోషల్‌ మీడియాలో జరుగుతున్న ప్రచారంలో వాస్తవం లేదని స్పష్టం చేసింది.  

గూగుల్‌ పే లావాదేవీలపై వచ్చిన పుకార్లపై సంస్థ స్పష్టత నిచ్చింది. గూగుల్‌ పే యాప్‌ చట్టపరిధిలోనే ఉండి పని చేస్తుందని, తాము అన్ని నిబంధనలను పాటిస్తున్నామని సంస్థ వివరణ ఇచ్చింది. తమ యాప్‌ యూపీఐ ద్వారా చెల్లింపుల కోసం బ్యాంకులకు టెక్నాలజీ సర్వీస్‌ ప్రొవైడర్‌గా వ్యవహరిస్తుందని పేర్కొంది. గూగుల్‌ పే ద్వారా జరిగే ప్రతీ లావాదేవి పూర్తిగా సురక్షితమేనని వెల్లడించింది. గూగుల్‌ పే థర్డ్‌ పార్టీ యాప్‌ ప్రొవైడర్‌ మాత్రమేనని, ఇది ఎలాంటి పేమెంట్‌ వ్యవస్థను నిర్వహించదని ఆర్‌బీఐ ఢిల్లీ హైకోర్టుకు స్పష్టం చేసింది. జాతీయ చెల్లింపుల కార్పొరేషన్‌ ప్రచురించిన అథీకృత చెల్లింపు వ్యవస్థల ఆపరేటర్ల జాబితాలో గూగుల్ పే లేదని ఆర్ బీఐ తెలిపింది. 

గూగుల్‌ పే కార్యకలాపాలు చెల్లింపులు పరిష్కారాల చట్టం 2007ను ఉల్లంఘించడం లేదని ఢిల్లీ హైకోర్టు ప్రధాన న్యాయమూర్తి జస్టిస్‌ డీఎన్‌ పటేల్‌, జస్టిస్‌ ప్రతీక్‌ జలన్‌లతో కూడిన బెంచ్‌కు ఆర్‌బీఐ నివేదించింది. గూగుల్ పే విషయంలో వచ్చిన వార్తల నిరాధారమయినవి అని, ఖాతాదారులు సురక్షితమయిన చెల్లింపులు చేసుకోవచ్చని గూగుల్ పే వివరించింది. 

ప్రపంచ వ్యాప్తంగా సోషల్ మీడియాలో ఎన్నో మార్పులు చోటుచేసుకుంటున్నాయి. ఈ నేపథ్యంలో ఎన్నెన్నో కొత్తరకాల యాప్ లు వస్తున్నాయి. తాజాగా చైనాకు వ్యతిరేకంగా భారతదేశంలో ప్రచారం సాగుతోంది. చైనా బ్యాన్,  చైనా యాప్స్ తొలగింపు గురించి ఎక్కువగా మాట్లాడుకుంటున్నారు జనం. ప్రపంచ వ్యాప్తంగా కోట్లాదిమందికి చేరువయిన గూగుల్ మరో విభాగం యూట్యూబ్ వినియోగదారులకు మరింత చేరువయ్యేందుకు కొత్త ఫీచర్‌తో రానున్నట్టు ప్రకటించింది. 

పాపులర్ వీడియో ప్లాట్‌ఫామ్, చైనాకు చెందిన టిక్‌టాక్‌ మాదిరిగానే సరికొత్త ఫీచర్‌ను యూట్యూబ్ త్వరలోనే త్వరలో ప్రారంభం కానుంది. గూగుల్ యాజమాన్యంలోని వీడియో ప్లాట్‌ఫాం క్రొత్త ఫీచర్‌ను పరీక్షిస్తోంది. ప్రస్తుతం ఆండ్రాయిడ్, ఐవోఎస్ రెండిండిలోనూ దీన్ని ప్రయోగాత్మకంగా పరీక్షిస్తున్నట్టు యూట్యూబ్ తెలిపింది. అయితే ఇందులో 15 సెకన్ల వీడియో పోస్ట్ చేయడానికి  మాత్రమే అనుమతి ఉంది. టిక్ టాక్ మాదిరిగా అన్ని రకాల ప్రత్యేకతలు ప్రస్తుతానికి ఇందులో అందుబాటులో లేవని తెలుస్తోంది. 

తమ వెబ్‌సైట్‌లో ఈ ఫీచర్‌ను ప్రయోగాత్మకంగా పరిశీలిస్తున్నట్లు యూట్యూబ్ ప్రకటించింది. పరీక్షల అనంతరం దీన్ని భారీగా ప్రారంభించనున్నారు. ఈ ఫీచర్ లో 15 సెకన్ల వరకు వీడియోలను పోస్ట్ చేయవచ్చు. ఒకేసారి ఎక్కువ వీడియోలను అప్‌లోడ్ చేయాలనుకుంటే, ఫోన్ గ్యాలరీ నుండి నేరుగా అప్‌లోడ్ చేయాల్సి ఉంటుందని పేర్కొంది. అయితే టిక్‌టాక్ మాదిరిగా ఫిల్టర్లు, మ్యూజిక్ సపోర్ట్ లభిస్తుందా అనే దానిపై స్పష్టత లేదు. టిక్‌టాక్ లేదా ఇతర ఆధునిక చిన్న వీడియో యాప్ లలో కూడా వీడియో కంటెంట్ లిమిట్ ఎక్కువ ఉండటంతోపాటు, ఏఆర్ ఎడిటింగ్ ఎఫెక్టులతో సోషల్ మీడియాలో హల్ చల్ చేస్తున్నాయి. యూట్యూబ్ దీన్ని మరింత మెరుగుపర్చాలని లేకుంటే వినియోగదారుల దీని గురించి ఆలోచించే అవకాశమే వుండదని అంటున్నారు.

షార్ట్స్ పేరుతో టిక్‌టాక్‌ లాంటి యాప్‌ను యూట్యూబ్ త్వరలో తీసుకురానుందని వార్తలు వచ్చాయి. ఆ ఫీచర్ గురించే యూట్యూబ్ ఇప్పుడు ప్రకటన చేసింది. ఇతర సోషల్ మీడియా ప్లాట్‌ఫామ్‌ల ఫీచర్లను అనుకరించడం యూట్యూబ్‌కి  కొత్తేం కాదు.  గతంలో ఫేస్‌బుక్, ఇన్‌స్టాగ్రాం, స్నాప్‌చాట్ తరహాలో స్టోరీస్ అప్‌డేట్ ఫీచర్‌ రీల్స్ ను ప్రవేశపెట్టింది. ప్రస్తుతం యూట్యూబ్ తీసుకురానున్న కొత్త ఫీచర్ గురించి ఆసక్తి కనబరుస్తున్నారు యూట్యూబ్ వినియోగదారులు. 

వన్ ప్లస్ ఫోన్లు దేశంలో ఎంత ఆదరణ పొందాయో అందరికీ తెలిసిందే. తాజాగా వన్ ప్లస్ సంస్థ స్మార్ట్ ఫోన్ కంటే సన్నగా వుండే స్మార్ట్ టీవీ రాబోతోంది. వీటితో పాటు బడ్జెట్ ధరలో మధ్యతరగతికి అందుబాటులో వుండేలా స్మార్ట్ టీవీలు రాబోతున్నాయి. ఈ టీవీల ధర రూ.69, 900 గా చెబుతోంది. ఇవి డీసీఐ పీ3, డాల్బీ విజన్ సపోర్ట్ తో అందిస్తోంది. వన్ ప్లస్ త్వరలో లాంచ్ చేయబోయే బడ్జెట్ టీవీల ధరలను కూడా వెల్లడించింది. 

ఈ టీవీలను జూలై 2వ తేదీన లాంచ్ చేయనున్నట్లు వన్ ప్లస్ ఇప్పటికే ప్రకటించింది. ఇప్పుడు వన్ ప్లస్ ఇండియా అధికారిక ట్వీటర్ పేజ్ ద్వారా ఈ టీవీల ధరలు రూ.10,999 నుంచి ప్రారంభం అవుతాయని పేర్కొంది. ధర ఎంతో అంచనా వేయమని ఫ్యాన్స్ కు సూచించింది. గత సంవత్సరం వన్ ప్లస్ క్యూ1, వన్ ప్లస్ క్యూ1 ప్రో టీవీలను ప్రీమియం రేంజ్ లో లాంచ్ చేసింది. ఇప్పుడు బడ్జెట్ విభాగంపై ఈ టీవీలు రానున్నాయి. 

ఈ టీవీల ధర రూ.10,999 నుంచి రూ.19,999లోపు ఉండే అవకాశం ఉంది. రియల్ మీ ఇటీవలే రూ.12,999, రూ.21,999 ధరల్లో రెండు టీవీలను లాంచ్ చేసింది. వేర్వేరు సైజుల్లో ఈ టీవీలను లాంచ్ చేయనున్నట్లు వన్ ప్లస్ తెలిపింది,ఈ టీవీల్లో కూడా అద్భుతమైన ఫీచర్లను తక్కువ ధరకే అందించనున్నట్లు వన్ ప్లస్ తెలిపింది. దీంతో పాటు డిజైన్ విషయంలో కూడా ప్రీమియం లుక్ ను వన్ ప్లస్ అందించనుంది.

మధ్యతరగతి వారిని ఇటువైపు లాగేసేందుకు ప్రయత్నం చేస్తోంది. 2019 సెప్టెంబర్ లో వన్ ప్లస్ టీవీ క్యూ1, వన్ ప్లస్ టీవీ క్యూ1 ప్రో స్మార్ట్ టీవీలను లాంచ్ చేశాయి. ఇవి రెండూ 55 అంగుళాల 4కే క్యూఎల్ఈడీ ప్యానెళ్లతో లాంచ్ అయ్యాయి. వీటిలో వన్ ప్లస్ టీవీ క్యూ1 ధర రూ.69,900గా ఉండగా, వన్ ప్లస్ టీవీ క్యూ1 ప్రో ధర రూ.99,900గా ఉంది.గతంలో బడ్జెట్ టీవీ గురించి అంతగా పట్టించుకోని వన్ ప్లస్ సంస్థ ఇప్పుడు సామాన్యులకు చేరువ కానుంది.