ఢిల్లీ సీపీపై హోంమంత్రి సీరియస్

03-07-201903-07-2019 15:06:29 IST
2019-07-03T09:36:29.722Z03-07-2019 2019-07-03T09:36:27.356Z - - 12-11-2019

ఈమధ్యకాలంలో  దేశ రాజ‌ధాని ఢిల్లీలో గ్యాంగ్ వార్ లు సాధారణం అయిపోయాయి. దీంతో జనం భయభ్రాంతులకు గురవుతున్నారు. తాజాగా చాందినీ చౌక్‌లో రెండురోజుల క్రితం రెండు వ‌ర్గాల మ‌ధ్య ఘ‌ర్షణ‌లు చోటుచేసుకున్నాయి. ఈ సందర్భంగా ఒక ప్రార్థనామందిరం పాడైంది. ఈ ఘ‌ట‌న‌పై కేంద్ర హోంశాఖ మంత్రి అమిత్ షా సీరియ‌స్ అయ్యారు. ఢిల్లీ పోలీసు క‌మీష‌న‌ర్ అమూల్య ప‌ట్నాయ‌క్‌ను ఆయ‌న మంద‌లించారు.

ఓ పార్కింగ్ స్థలం గురించి రెండు వ‌ర్గాల మ‌ధ్య ఘ‌ర్షణ త‌లెత్తింది. ఈ అల్లర్లలో ఓ ప్రార్థనా మందిరం ధ్వంస‌మైంది. దీని గురించి తెలుసుకునేందుకు ఢిల్లీ పోలీసు చీఫ్‌కు కేంద్ర హోంశాఖ స‌మ‌న్లు జారీ చేసింది. చాందినీ చౌక్‌లోని హౌజ్ ఖ్వాజీ ప్రాంతంలో జ‌రిగిన ఈ ఘ‌ట‌న‌కు సంబంధించి న‌లుగురు వ్యక్తులను అరెస్ట్ చేశారు పోలీసులు.

ఇదిలా ఉంటే ప్రార్థనా మందిరం కూల్చివేత ఘ‌ట‌న‌పై ఢిల్లీ హైకోర్టులో అడ్వ‌కేట్ అల‌క్ పిల్ వేశారు. ఓ బిల్డింగ్ ముందు 20 ఏళ్ల కుర్రాడు స్కూట‌ర్ పార్కింగ్ చేస్తున్న స‌మ‌యంలో గొడ‌వ జ‌రిగింది.  దీంతో ఆ ప్రాంతంలో వందలాది మంది పోలీసులు, పారా మిలటరీ సైనికులు మోహరించారు. ఈప్రాంతంలో శాంతి సామరస్యాలు నెలకొల్పేందుకు ప్రయత్నిస్తున్నామని డిప్యూటీ సీపీ మన్ దీప్ సింగ్ రాంధవా తెలిపారు. సాధారణ పరిస్ధితులు నెలకొనేలా అంతా సహకరించాలని ఆయన విజ్ఞప్తి చేశారు.